„Greifinn tók greinilega eftir því og hörfaði. Hann glotti fremur grimmilega og sýndi meira af framstæðum tönnunum en hann hafði áður sýnt. Hann settist aftur niður sín megin við eldstæðið. Við þögðum báðir um stund og þegar ég leit í átt að glugganum sá ég fyrstu ljósglætu komandi dags. Yfir öllu var undarleg kyrrð. Þrátt fyrir það varð ég var við marga úlfa spangóla neðar í dalnum. Augu greifans blikuðu og hann sagði: „Hlýðið á börn næturinnar. Hve tónlist þeirra er töfrandi!“

Fyrsta heildarþýðingin á íslensku

Drakúla, eftir Bram Stoker, er án efa ein þekktasta hrollvekja allra tíma. Hún kom fyrst út árið 1897 og hefur verið endurútgefin reglulega. Sagan hefur þó aldrei áður komið út í heildarþýðingu á íslensku. „Í raun var þetta verkefni sem okkur fannst við þurfa að ráðast í, svona í ljósi þess að við leggjum áherslu á furðusögur,“ segir Þorsteinn Mar, útgáfustjóri Rúnatýs. „Drakúla er ein af þremur stóru hrollvekjunum, sem stundum er talað um sem „the great three“, ásamt Frankenstein og Dr. Jekyll and Mr. Hyde sem báðar eru til í nýlegum íslenskum þýðingum.“

Það var vandað vel til verks við þýðinguna og má nefna að yfir 100 neðanmálsgreinar eru í bókinni, sem auðvelda lesandanum að skilja textatengsl og skilja þann heim sem sagan er skrifuð í, en neðanmálgreinarnar eru unnar af þýðandanum, Gerði Sif Ingvarsdóttur.

Íslenskir lesendur hafa þó áður getað kynnt sér söguna en hún kom út í endursögn Valdimars Ásgeirssonar í tímaritinu Eimreiðinni snemma á 20. öld, undir nafninu Makt myrkranna, ásamt því að endursagnir fyrir yngri lesendur hafa verið birtar í gegnum tíðina. „Okkur fannst mikilvægt að íslenskur lesendur ættu þess kost að lesa söguna í heild og kynnast því af hverju hún hefur lifað öll þessi ár. Drakúla þarf einfaldlega að vera til á íslensku,“ bætir Þorsteinn við.

Fleiri titlar frá Rúnatý fyrir jólin

Rúnatýr gefur einnig út bókina Vargsöld, núna fyrir jólin, en hún kom út fyrr á árinu í kiljuformi. Bókin, sem er hörkuspennandi fantasía, sem fékk mjög góða dóma í vor og er góður valkostur fyrir alla sem unna furðusögum.

The post Drakúla á íslensku appeared first on Rúnatýr.

Smelltu á myndina til að sjá hana stóra.

Smelltu á myndina til að sjá hana stóra.

The post Viðtal við höfundana okkar appeared first on Rúnatýr.

Margir mannsaldrar eru síðan Norðmæri byggðist og eru þar nokkur þorp auk höfuðborgarinnar Fálkahafnar. Stærst þessara þorpa er Vegamót, en það stendur við mót nokkurra þekktra slóða. Þorpsbúar hafa atvinnu af því að selja unnar vörur úr skóginum og grænstakkar verja það  og vegina í skóginum gegn óvættum og rándýrum. Vesturvör stendur við Arnarmar og þar hafa þorpsbúar helst atvinnu af fiskveiðum. Landverðir gæta þorpsins og vitanna í kringum það. Þrúðheimar er nyrsta þorpið á Norðmæri, þar hafa þorpsbúar einkum atvinnu af fiskveiðum og verslun hvers konar. Þryðir verja Þrúðheima. Slévað stendur við, eins og nafnið gefur til kynna, við vað á fljótinu Slé og er minnsta þorpið af þeim. Íbúar vinna vörur úr skóginum og lítill hópur varðmanna verja það og slóðirnar í kring. Fálkahöfn er höfuðborg Norðmæris og þar býr Arbert, greifi, í kastalanum Skrúðsborg. Fálkahöfn stendur við ósa Skrúðsár en fyrir utan borgina stendur Skrúður þar sem kastali greifans stendur.

Í skóginum eru fjölbreytt dýralíf en flestum óvættum hefur verið bolað úr skóginum. Tröll búa nú aðallega í Dröngum á Karlaskaga. Þjóðsögur segja að ugrar, dularfullar verur sem sagðar eru eiga í sérstöku sambandi við skóginn og náttúruna, búi undir rótum Dyngjufjalla. Helstu rándýrin í skóginum eru úlfar, rauðbirnir, gaupur, rökkurrefir og fjallaljón. Rauðviðartrén sjálf eru há og stofnar þess þykkir. Íbúar landsins, og sérstaklega þeir sem búa í kringum Vegamót, hafa lært að búa sér til greni og smáhýsi á greinum trjánna, þangað sem hægt er að leita skjóls eða sem geymslur. Úr viðnum er hægt að vinna húsgögn og ýmis tól, en íbúar landsins kaupa mestan málm frá Dölunum. Flestir fara um fótgangandi, að riddurum greifans undanskildum, enda hestar munaður sem fæstir geta leyft sér.

Í sögunni segir frá grænstakkinum Ráðgríð, ungri konu frá þorpinu Vegamótum. Þegar undarlegar verur sækja að Vegamótum slær óhug að íbúum þess og fær Ráðgríð það verkefni, ásamt Hræreki vini sínum, að flytja greifanum í Fálkahöfn fréttirnar. Sú ferð á að eftir að draga dilk á eftir sér og lenda þau í miklum ævintýrum í kjölfarið.

Vargsöld er fáanleg í flestum betri bókabúðum. Einnig er hægt að nálgast rafbókina hjá flestum rafbókabúðum.

The post Sögusvið Vargsaldar appeared first on Rúnatýr.

Smelltu hér til að sjá metsölulista Eymundsson.

The post Hvítir múrar borgarinnar ná inn á aðallista íslenskra bóka appeared first on Rúnatýr.

Illur máni er dreginn á næturhimin og langur vetur í nánd

Fyrir mörgum öldum spáði jórskur prestur því, að upp rynni öld Vargsins með svartnætti sínu og óvættum. Þegar ókunnar verur ráðast á þorpið Vegamót slær óhug að íbúum þess og fær Ráðgríð, ásamt vini sínum Hræreki, það verkefni að láta greifann af Norðmæri vita en sú ferð á eftir að draga dilk á eftir sér og mun reyna á vináttu þeirra. Hefur Ráðgríð það sem þarf til að vera hetja?

Út er komin fantasían Vargsöld eftir rithöfundinn Þorstein Mar. Um er að ræða ungmennasögu (e. Young-Adult) sem segir frá Ráðgríð, ungri konu, sem býr í landi sem heitir Norðmæri. Hún lendir þar í ýmsum ævintýrum og þarf að takast á við ólíkar hættur, bæði vættir og menn. Er þessi bók sú fyrsta í sögunni um Ráðgríð, en bókaflokkurinn mun bera nafnið Roðasteinninn.

„Langaði að skrifa um kvenhetju“

„Mig langaði til að skrifa fantasíu þar sem væri að finna kvenhetju, því mér finnst stundum hallað á konur í hefðbundnum fantasíum,“ segir Þorsteinn Mar. Í heimssköpun sinni sækir hann jafnt í brunn þjóð- og Íslendingasagna, sem og til hefðbundinna fantasía.

Furðusögur og fantasíur hafa verið vaxandi hérlendis undanfarin ár og áhugi lesenda aukist jafnt og þétt. Fantasíur hafa átt miklum vinsældum að fagna erlendis og hafa aðeins þær allra vinsælustu verið þýddar, sbr. Hringadróttinssaga og Harry Potter.

Út hafa komið tvær bækur eftir Þorstein Mar, smásagnasafnið Myrkfælni og skáldsagan Þoka. Þá hafa einnig komið út styttri textar eftir hann í rafbókaformi, t.d. nóvellan Svartárkot og ýmsar smásögur. Eins þýddi hann smásögur eftir H. P. Lovecraft sem komu út í safni á síðasta ári, Kall Cthulhu og fleiri hrollvekjandi sögur.

Úr umsögnum um Vargsöld:

Brynhildur Heiðar- og Ómarsdóttir (Orð um bækur): …lipurlega skrifuð fantasía, vel uppbyggð og spennandi … ég myndi ekki hika við að gefa unglingunum í fjölskyldu minni þessa bók að gjöf …

Védís Ragnheiðardóttir (Nörd Norðursins): …mér finnst sagan áhugaverð og ég hlakka til að lesa hvað gerist í næstu bókum, aðalpersónur og helstu aukapersónur eru áhugaverðar og ólíkar og allar eru þær margbrotnar…

Ármann Halldórsson: …Þorsteinn er vaxandi og spennandi höfundur … ég legg til að allir sem einhvern áhuga hafi á svona bókum stökkvi í næstu bókabúð og kaupi sér eintak…

Kápa bókarinnar er unnin af listakonunni Margréti Nilsdóttur.

The post Vargsöld appeared first on Rúnatýr.

Fyrsta ber að nefna vísindaskáldsöguna Hvítir múrar borgarinnar eftir Einar Leif Nielsen. Sagan segir frá Lex, starfsmanni innheimtufyrirtækisins Mammon, sem ákveður að rannsaka mál sem fyrirtækið hefur lokað. Það leiðir hann fljótt í atburðarrás sem á eftir að hafa stórvægileg áhrif á líf hans og allra íbúa risavöxnu borgarinnar þar sem Lex býr. Hvítir múrar borgarinnar kom út sem rafbók í janúar síðastliðnum og hefur hlotið ágætar viðtökur, bæði selst vel og fengið jákvæða dóma. Þetta er fyrsta bók Einars.

Þá mun einnig koma út fantasían Vargsöld, sem er fyrsta bókin í lengri bókaflokki. Fyrir mörgum öldum spáði jórskur prestur því, að upp rynni öld Vargsins með svartnætti sínu og óvættum. Þegar framandi verur ráðast á þorpið Vegamót slær óhug að íbúum þess og fær Ráðgríð, ásamt vini sínum Hræreki, það verkefni að láta greifann af Norðmæri vita en sú ferð á eftir að draga dilk á eftir sér og mun reyna á vináttu þeirra. Hefur Ráðgríð það sem þarf til að verða hetja? Vargsöld er þriðja bók Þorsteins, en áður hafa komið út smásagnasafnið Myrkfælni og skáldsagan Þoka.

Eins vonumst við til að koma gufupönkssögunni Flóttinn til skýjanna eftir Kristján Má Gunnarsson í kilju í sumar. Segir sagan frá Trinius, sem er rómverskur og endar sem strandaglópur í borginni þegar umsátrið hefst. Hann tekur höndum saman við Júlíu, skipstjóra sjóræningjaskipsins Ariadne. Saman hrinda þau af stað flóttaáætlun sem er bæði stórhættulega og snarbrjáluð. En þegar hið mögulega þrýtur, reynirðu hið ómögulega. Flóttinn til skýjanna er fyrsta bók í Rómarþríleiknum, þar sem loftskipssjóræningjar og leynifélög berjast um völd og áhrif. Eins er sagan fyrsta bók Kristjáns Más.

The post Nýir titlar væntanlegir í kilju appeared first on Rúnatýr.

Hvítir múrar borgarinnar

Í lok janúar kom út í rafbókaformi vísindaskáldsagan Hvítir múrar borgarinnar eftir Einar Leif Nielsen. Gerist sagan í óskilgreindri framtíð í ónefndri borg, þar sem allt er fallt fyrir peninga. Aðalpersóna sögunnar, Lex sem starfar hjá innheimtustofnun borgarinnar, er ekki sáttur við eina innheimtu og ákveður að rannsaka það mál upp á eigin spýtur, en er hann reiðubúinn undir það sem hann kann að finna? Er hann tilbúinn að færa þær fórnir sem það útheimtir? Sagan hefur fengið ágætar viðtökur og prýðisgóða dóma. Er hún væntanlega í kiljuformi þegar nær dregur sumri.

Flóttinn til skýjanna

Ekki lokaútgáfa af kápu

Á næstunni er væntanleg gufupönkssagan Flóttinn til skýjanna eftir Kristján Má Gunnarsson. Sagan segir frá róstusömum sólarhring í borginni Bushehr við Persaflóa, þar sem herir Rómverska heimsveldisins hafa umkringt borginni í örvæntingarfullri leit að nokkrum einstaklingum. Gerist sagan árið 1407 e.kr. og er gengið út frá því, að Rómarveldi hafi aldrei hrunið og hinar myrku miðaldir aldrei átt sér stað. Aðalsöguhetjur leita leiða til að komast úr borginni áður en sprengjur rómverska stórskotaliðsins byrja að falla. Úr verður æsispennandi saga og verður áhugavert að sjá hvernig íslenskir lesendur taka á móti gufupönkssögu.

Drakúla

Líklega verður ekki ofsagt að sagan af greifanum illa frá Transilvaníu sé ein allra þekktasta vampírusaga seinni tíma. Fjölmargar kvikmyndir hafa verið gerðar upp úr efni bókarinnar og Drakúla sjálfur birst sem illmenni eða andhetja í ótalmörgum verkum. Hið undarlega er þó, að aldrei hefur komið út heildstæð þýðing á bók Bram Stokers, aðeins endursagnir. Við stefnum á að gefa út þýðingu á bókinni á haustmánuðum og hlökkum til að sjá hvernig Íslendingar taka við greifanum ódauðlega.

Auk þessara þriggja bóka erum við í óða önn að ljúka ritstjórn á fantasíu, sem er í senn klassísk en um leið nýstárleg. Við hvetjum aðdáendur góðra fantasía til að fylgjast gaumgæfilega með okkur á næstu vikum, þegar við munum færa ykkur nánari fréttir af þessari áhugaverðu sögu.

Að sjálfsögðu erum við alltaf til í að taka á móti og lesa fleiri handrit. Af gefnu tilefnum viljum við þó benda á, að við leggjum áherslu á að gefa út íslenskar furðusögur á íslensku fyrir íslenska lesendur.

The post Væntanlegar furðusögur frá Rúnatý appeared first on Rúnatýr.

Segir sagan frá Trinius, sem er rómverskur og endar sem strandaglópur í borginni þegar umsátrið hefst. Hann tekur höndum saman við Júlíu, skipstjóra sjóræningjaskipsins Ariadne. Saman hrinda þau af stað flóttaáætlun sem er bæði stórhættulega og snarbrjáluð.

En þegar hið mögulega þrýtur, reynirðu hið ómögulega.

Flóttinn til skýjanna er fyrsta bók í Rómarþríleiknum, þar sem loftskipssjóræningjar og leynifélög berjast um völd og áhrif. Leyndarmál úr fortíð veldisins koma í ljós og munu móta framtíð þess.

Hér að neðan má lesa stuttan kafla úr byrjun bókarinnar.

Flóttinn til skýjanna

Úr 2. kafla

Fréttir af atburðum morgunsins bárust hratt um borgina. Æstir skipstjórar reyndu að leggja úr höfn en voru stöðvaðir af rómverskum skipum. Fáir sneru aftur og þeir sem það gerðu breiddu út sögur um mannlaus vélknúin skip, að Rómverjar væru lítið annað en úrverk og olía.

Trinius var Rómverji sem gæti svarið fyrir að vera knúinn af gufu eða eldsneyti en slíkar áhyggjur voru honum ekki efst í huga. Fréttirnar höfðu ekki borist honum og ferðafélögum hans, hótelið sem þau héldu sig í lagði mikið upp úr því að halda umhverfi hótelsins og andrúmslofti afslöppuðu. Á óvart kom því þegar serkklæddur Persi braust í gegnum anddyrið og hrópaði á persnesku yfir veitingastofuna þar sem Trinius sat. Gestirnir litu furðu lostnir upp frá drykkjum sínum í átt að manninum sem stóð í rauðgylltu dyrunum og jakkafataklædda þjónana sem réðust á hann. Fleiri Persar blönduðust í rimmuna uns Trinius missti töluna á fólkinu sem var þar samankomið.

„Hvað sagði hann,“ spurði Trinius og rýndi í þvöguna.

Terentia leit frá rifrildinu og sagði áhugalaus: „Kannski er hann reka þetta fólk áfram, við fáum þá kannski einhverja þjónustu.“ Harður hreimur norðursins loddi við hvert orð.

„Ólíklegt, himnarnir hrynja áður en þeir læra að brenna ekki kaffið þitt,“ sagði Trinius og gafst upp á að fylgjast með óhljóðunum.

Terentia brosti ofan í kaffibollann. „Ég veit ekki, það er örlítið ljósara núna, ekki mikið öskubragð.“ Trinius leist svo á að kuldinn í fæðingarlandi hennar hefði kælt orðaflæðið. Hún hélt því hins vegar fram að  hann talaði of hratt.

„Og ennþá drekkurðu það,“ sagði Trinius og fékk sér sopa af of heitu tei.

„Betra en tesullið þitt,“ sagði hún með glott á vör og sneri sér aftur að bókinni.

Terentia var freknótt og sólbrennd með stutt rautt hár sem stakk í stúf í veitingarýminu og þessum heimshluta öllum. Gyllt augu hennar voru sem límd á lítilli bók, svo gamalli að hún virtist vera að hrökkva í sundur. Fíngerðar en sólbrenndar hendur gættu sín á því að halda kaffibollanum frá bókinni. Brúnt pils náði henni að hnjám, og rauðgyllt lífstykki hélt henni teinréttri. Hún var í hvítri skyrtu sem hafði átt betri daga en eftir langa dvöl í eyðimörkinni hafði Terentia ekki margra kosta völ.

Trinius var vel greiddur og svarthærður með langt andlit og kröftugt nef. Hann hafði reynt að viðhalda yfirvaraskeggi en eftir nokkra daga án raksturs var það horfið í stutt alskegg. Sægrænu augun virtust glóa þegar hugmyndirnar flæddu um höfuð hans. Hann var í óhreinum gulbrúnum jakka, brúnu vesti og hvítri skyrtu með brunabletti. Ólíkt Terentiu sem virtist ekki vera að flýta sér agnarögn hafði hann hvorki bók við höndina né virtist hann njóta þess að vera á veitingastofunni. Frá sýlófón ómuðu róleg lög frá Vestur-Afríku og blár tóbaksreykur liðaðist um stofuna. Þvagan í anddyrinu mjakaðist rólega frá veitingastofunni og í átt að stóru og opnu anddyri.

„Hvenær förum við héðan,“ spurði hann og horfði á svitastokkið hár hennar bærast í andvaranum.

Terentia svaraði ekki strax, upptekin við lesturinn: „Í nótt, við þurfum að fara aftur til Kronus. Síðan beint til Rómar.“

„Komumst við ekki fyrr?“ spurði Trinius óþolinmóður.

Terentia leit upp. „Hefurðu einhverjar áhyggjur?“

„Það er her fyrir utan borgina,“ hvíslaði Trinius og benti í þá átt sem hann taldi líklegast að borgarmúrarnir voru. „Tíu þúsund manns að leita að okkur og bókunum sem við tókum.“

Terentia grúfði sig á ný yfir bókina. „Þeir komast ekki inn fyrir hliðin. Bundnir af heimskulegum samningum og skriffinnsku.“

Trinius yggldi sig. „Já, kannski, en samt. Tíu þúsund manns.“

Hún tók sopa af kaffinu og svaraði Trinius kaldhæðnislega: „Einn her. Og við vitum bæði að hann hefur ekki tíu þúsund manns.“

„Ekki gleyma flotanum,“ hvíslaði Trinius önugur.

Hún yppti öxlum. „Þeir geta átt sig, um leið og við erum kominn á Helios erum við örugg.“

Trinius leit óþolinmóður í kringum sig og sagði þreytulega: „Eigum við þá ekki að koma okkur?“

„Þú getur talað við  Markús. Ég ætla ekki að stressa mig.“

Trinius andvarpaði, hallaði sér nær henni og hvæsti: „Þetta er ekki spurning um að stressa sig. Ég vil bara komast héðan sem fyrst. Tíu þúsund manna her á höttunum eftir manni hefur þannig áhrif á flesta.“

Hún beyglaði munninn og sagði önuglega: „Þú lætur eins og krakki. Ég veit hvað þessir menn geta gert. Ég var með þér þegar við flúðum Kronus, en við vitum að Harkle kemst aldrei hingað inn því hann er klaufi. Ef hann hefði sent fimmtíu menn klædda eins og íbúa Bushehr hefði hann náð okkur vandræðalaust. Hann tók hins vegar allt herfylkið með sér og kallaði til fjögur skip að auki. Þessi borg er undir vernd Rómar en stjórnendur hennar þurfa ekki að taka við hernum frekar en þeir vilja. Konungurinn hér er gamall og rótgróinn asni og hleypir engum inn fyrr en eftir nokkra daga rifrildi og vitleysu. Á meðan hverfum við út í nóttina.“

Trinius starði á Terentiu og reyndi að finna einhver mótrök en gafst upp. Terentia sneri sér á ný að bókinni og rautt hár hennar skein í ljósi gaslampans fyrir ofan.

„Það hljóta að vera lög gegn því að hafa svona oft rétt fyrir sér og líta samt svona vel út,“ sagði hann og gafst upp.

Terentia brosti um leið og hún svaraði: „Þakkaðu bara fyrir að þú fáir að njóta hvoru tveggja.“

Hvað sem var að gerast í anddyrinu náði hámarki. Raddirnar urðu háværari og æstari. Trinius sneri sér í stólnum og horfði á stóra konu grípa í hárið á manni og snúa hann niður. Stór og luralegur karl birtist og dró manngreyið út úr hótelinu. Einhverjir komu honum til hjálpar en þeim var líka hent öfugum út. Fyrir utan mynduðu þeir hóp sem öskraði á þá sem voru inni á hótelinu.

Terentia leit upp. „Hvað gengur eiginlega á?“

„Ekki spyrja mig,“ svaraði Trinius og reyndi að henda reiður á hversu margir voru fyrir utan.

„Það er allt farið í hundana, það er það sem gengur á,“ sagði  Markús sem birtist skyndilega hjá þeim.  Markús var feitlaginn maður sem kjagaði venjulega áfram með háum stunum og mikilli fyrirhöfn. Það að honum hafði tekist að komast svo nærri þeim án þess að parið tæki eftir því var ekkert minna en kraftaverk.

„Við verðum að koma okkur frá Bushehr,“ sagði hann svo hratt að erfitt var að skilja orðaflauminn.

„Hvað áttu við,“ spurði Trinius og sneri sér frá ólátunum.

Markús þerraði svita af enninu með hvítum klút. „Konungurinn fékk sendiboða frá vini okkar, Harkle.“

Terentia lagði bókina frá sér. „Og? Er herinn að koma?“

„Það má segja það,“ sagði  Markús og tróð klútnum í vasa á teinóttri skyrtu. „Konungurinn drap sendiboðann!“

The post Flóttinn til skýjanna – væntanleg gufupönkssaga appeared first on Rúnatýr.

Myrkfælni kom út vorið 2011 og fékk ágætar viðtökur, þrjár stjörnur og Þorsteinn sagður efnilegur höfundur. Lesendur rekast á ýmsar furður og fólk, jafnt úr fortíð sem nútíð. Sumt má útskýra, annað ekki. Draugar og hvers kyns óvættir birtast mönnum, leiða þá á villgötur og vekja óhug.

Skömmu eftir áramót snemma á 9. áratugnum finnst mannlaust skip á Faxaflóa. Enginn veit hvaðan það kom, hvers lenskt það er eða hvernig það endaði við Íslandsstrendur. Eftir að Landhelgisgæslan hefur dregið skipið til hafnar er því komið í hendurnar á lögreglu til frekari rannsókna þar sem auðsýnilegt er að eitthvað slæmt hefur gerst um borð. Upp frá því hefst hrina hryllilegra morða í Reykjavík og undarleg þoka leggst yfir borgina við Sundin. Nokkrir fræðimenn eru kallaðir til aðstoðar en tekst þeim að komast að því hver morðinginn er?

H. P. Lovecraft er einn af áhrifamestu höfundum hryllingsbókmennta samtímans. Eftir hann liggja fjölmargar smásögur og nóvellur. Í þessu safni er reynt að gefa mynd af höfundarverki hans. Í safninu má finna sögurnar Vitnisburður Randolps Carters, Hinir guðirnir, Kettirnir í Ulthar, Kall Cthulhu og Við hugarfársins fjöll.

Smásagnasafnið Tvisvar á ævinni inniheldur margar af besti smásögum Ágústs Borgþórs, en hann er meðal okkar fremstu smásagnahöfunda. Margar af þeim níu sögum sem hér er að finna hafa birst á prenti áður sem og unnið til verðlauna. Stíll Ágústs er einfaldur, blátt áfram og myndríkur. Titill bókarinnar vísar hins vegar til meginþema sagnanna, en þær lýsa því á óvæntan og stundum dulúðugan hátt hvernig fortíðin vitjar okkar, persónurnar verða oft fyrir sömu reynslunni í annað sinn á ævinni og bregðast við henni og minningunni sem hún vekur á mismunandi hátt.

Nóvellan Stolnar stundir segir frá nokkrum dögum í lífi ungra hjóna. Hringt er í skakkt númer sem á eftir að hafa ófyrirséðar afleiðingar og leyndarmál er afhjúpað. Stíll sögunnar er einfaldur en undir yfirborðinu leynast margræðar spurningar, meðal annars um sjálfstæði einstaklingsins gagnvart hlutverkunum sem hann leikur í tilverunni og hugarfarið í samfélaginu á nýliðnum góðærisárum.

Í borg framtíðarinnar er allt falt fyrir rétt verð. Hverfi eru girt af með veggjum til að verja borgarana fyrir hvor öðrum og mismunandi stéttir aðskildar. Þeir sem standa ekki við skuldbindingar sínar er vísað úr borginni eða jafnvel teknir af lífi. Lex Absque er starfsmaður Vegarins sem innheimtir skuldir fyrir stórfyrirtækið Mammon. Eina kvöldstund verður á vegi hans mál sem tengist einum af valdamestu mönnum samfélagsins. Hann er sendur í eitt fínasta hverfi borgarinnar að vegna morðs á fjármálastjóra Mammons. Morðinginn er auðfundinn en Lex er ósáttur við lyktir málsins. Hann ákveður því komast að sannleikanum sjálfur. Þetta leiðir hann inn í atburðarrás sem mun hafa áhrif á alla borgarbúa.

The post Rúnatýr á Goodreads appeared first on Rúnatýr.

Sagan segir, í stuttu máli, frá vampírunni Drakúla greifa og komu hans til Englands. Hann nýtur til þess aðstoðar Jonathans Harkers, sem er fulltrúi lögmannstofu í Lundúnum. Greifinn nærist á nokkrum aðilum í Englandi, þeirra á meðal Minu, tilvonandi eiginkonu Jonathans, og berst Harker, með aðstoða vina þeirra hjóna, m.a. Abrahams van Helsings, við greifann og að losa Minu undan áhrifum og bölvun Drakúla.

Viðtökur

Þó svo að sagan hafi hlotið lof gagnrýnenda þá sló hún ekki gegn við útkomu hennar og í raun er ekki hægt að segja að hún hafi náð athygli almennings fyrr en F. W. Murnay gerði kvikmyndina Nosferatu sem byggð var á sögunni. Kvikmyndin kom út árið 1922, tíu árum eftir andlát Stokers og sá hann því aldrei söguna hljóta þá viðurkenningu sem hún átti skilið. Reyndar var það svo, að Stoker var svo fátækur síðustu æviár sín að hann lifði á styrkjum og neyddist ekkja hans til að selja handritið að bókinni á uppboði ári eftir andlát Stokers, en það fór á 2 pund hjá uppboðshúsi.

Um söguna

Vinnutitill Drakúla var The dead un-dead og allt þar til nokkrum vikum fyrir útgáfu bar það titilinn The Un-Dead. Greifinn bar auk þess nafnið Wampyr lengi framan af og var það ekki fyrr en Stoker las sögu Vlad II, sem hafði tekið upp nafnið Dracul, eftir að hafa hlotið inngöngu í riddarareglu drekans, eða Order of the Dragon, sem var stofnuð árið 1408 af Sigismund, konungi Ungverjalands. Reglunni var ætlað það hlutverk að berjast gegn andstæðingum kristninnar og þá sérstaklega Ottoman-veldinu.

Sagan er um 160 þúsund orð á lengd og var þó stytt nokkuð af ritstjóra Stokers, t.d. birtist smásagan Gestur Drakúla árið 1914, en þar er að finna frásögn sem upphaflega var hluti af 1. kafla. Drakúla inniheldur 27. kafla og er sögð í dagbókarformi, en sögumenn eru nokkrir. Í dag er hún allajafna flokkuð sem ein af hrollvekjunum þremur, en hinar tvær eru Frankenstein eftir Mary Shelley og Dr. Jekyll & Mr. Hyde eftir Robert L. Stevenson.

Áhrif Drakúla verða seint vanmetin. Óteljandi kvikmyndir hafa verið gerðar þar sem greifinn kemur við sögu og hafa margir leikarar spreytt sig á hlutverki hans, m.a. Bela Lugosi, Gary Oldman og Christopher Lee. Sagan hefur einnig haft áhrif hérlendis og m.a. sagði Halldór Laxness að hann hefði lesið þýðingu Valdimars spjalda á milli. Einnig er hægt að sjá tengsl á milli sögu Stokers og Kristnihalds undir Jökli.

Rúnatýr er um þessar mundir að vinna að þýðingu á þessari mögnuðu sögu og stefnan er að koma henni í sölu á þessu ári.

The post Drakúla appeared first on Rúnatýr.